15 yaşlıların oxu savadlılığı zəifdir: Nazir açıqladı

Azərbaycanda 15 yaşlı şagirdlərin təxminən üçdə ikisi oxuduqlarını tam anlamaqda çətinlik çəkir. Bu barədə elm və təhsil naziri Emin Əmrullayev PISA 2025 – Şagird Qiymətləndirilməsi üzrə Beynəlxalq Proqramın nəticələrinin təqdimatı zamanı məlumat verib.

Minval.info xəbər verir ki, nazirin açıqladığı göstəricilərə əsasən, yeniyetmələr arasında oxu savadlılığı əsas problem olaraq diqqət çəkir. Şagirdlər mətni oxuya bilsələr də, onun məzmununu, əsas fikrini və mənasını düzgün dərk etməkdə çətinlik çəkirlər.

Maraqlıdır ki, bu problemin yaş artdıqca avtomatik şəkildə aradan qalxmadığı vurğulanır. Oxu və anlama bacarıqları vaxtında formalaşdırılmadıqda, bu çatışmazlıq sonrakı təhsil və peşə həyatında da özünü göstərə bilər. PISA nəticələrində Azərbaycanın riyazi savadlılıq və təbiət elmləri üzrə göstəriciləri isə oxu savadlılığı ilə müqayisədə nisbətən yaxşı qiymətləndirilir.