3,1 milyard il əvvəl su vulkanları oyandırdı

Beynəlxalq geoloqlar qrupu tərəfindən aparılan tədqiqat nəticəsində 3,1 milyard il əvvəl suyun Yer kürəsinin dərinliklərinə daxil olaraq vulkan püskürmələrinə səbəb olduğu müəyyən edilib. Avstraliyanın Adelaide Universitetinin geokimyaçısı doktor Erik Vandenburqun rəhbərlik etdiyi tədqiqat qrupu, Qərbi Avstraliyanın Pilbara bölgəsindəki ən qədim vulkanik süxurları araşdırıb.

Minval.info xəbər verir ki, tədqiqat zamanı müasir Sakit okeanın “Od halqası”na bənzər vulkanik strukturların, yerin kilometrlərlə dərinliyinə daxil olan suyun maqmanı hərəkətə gətirməsi nəticəsində yarandığı müəyyən edilib. Alimlərin fikrincə, Yer kürəsinin ilkin dövrlərində planet müasir tektonik plitələrin hərəkət edə bilməsi üçün həddindən artıq isti olub. Bu səbəbdən su mantiyaya “damcı batması” adlandırılan fərqli mexanizmlə daxil olub.

Bu proses zamanı soyuq xarici qabıqda su ilə zəngin ağır hissələr zamanla isti mantiyanın daxilinə çöküb. Burada ayrılan su isə böyük vulkan püskürmələrinə səbəb olan maqmanın formalaşmasını sürətləndirib. Doktor Vandenburq bildirib ki, əldə olunan nəticələr erkən Yerin düşünüldüyü kimi sabit deyil, əksinə, olduqca dinamik olduğunu göstərir. Alimlər hesab edirlər ki, araşdırmanın nəticələri qitələrin ilkin formalaşmasını və Yerin bugünkü geoloji quruluşuna necə çevrildiyini anlamaq üçün mühüm əhəmiyyət daşıyır.