“Şuşa İli”nə həsr olunmuş kitablar təqdim olunacaq

Kürdəmir Regional Mədəniyyət İdarəsinin dəstəyi ilə nəşr olunan “Şuşa İli”nə həsr olunmuş “Zəfərin Amili” və “Yeni bir səhər” kitablarının təqdimatı keçiriləcək.

Tədbir 23 sentyabr saat 15:00-da Azərbaycan Yazıçılar Birliyində keçiriləcək.

“Zəfərin Amili” 44 günlük Vətən müharibəsində qəhrəmancasına şəhid olan Amil Hüseynovun həyatını mərkəzə alaraq əslində, bütün şəhidlərin, müharibə iştirakçılarının və müharibə zamanında onları gözləyənlərin duyğularından, yaşantılarından bəhs edir. Şəhidin həyat yoldaşı Xalisə xanım 44 günlük Vətən müharibəsində yaşananların bir qadının həyatında nələri dəyişdiyini anladır.

“Yeni bir səhər” kitabı isə regionda yaşayan istedadlı gənclərdən olan Aygün Bayramlının şeirlərindən ibarət bir topludur.

Hər iki nəşrin layihə rəhbəri və ön sözün müəllifi Kürdəmir Regional Mədəniyyət İdarəsinin rəisi, fəlsəfə üzrə fəlsəfə doktoru Faiq Xudanlı, redaktoru idarənin Xocavənd rayonu üzrə nümayəndəsi, yazar, ədəbiyyatşünas Ramil Əhməddir.