Husilər iddia etdi: Səudiyyə Ərəbistanına məxsus “Bayraktar Akıncı” vurulub

Yəməndə husi hərəkatı Səudiyyə Ərəbistanına məxsus olduğu iddia edilən “Bayraktar Akıncı” pilotsuz uçuş aparatının vurulduğunu açıqlayıb.

Minval.info xəbər verir ki, bu barədə husilərin sözçüsü Yəhya Səriyə məlumat verib.

Onun sözlərinə görə, Türkiyə istehsalı olan “Bayraktar Akıncı” kəşfiyyat və zərbə PUA-sı Yəmənin Əl-Cauf əyaləti üzərində həyata keçirilən əməliyyat zamanı vurulub.

Səriyə bildirib ki, pilotsuz uçuş aparatı Səudiyyə Ərəbistanına məxsus olub və Əl-Cauf bölgəsində əməliyyatlarda iştirak edirdi.

Qeyd edək ki, son günlər Yəmənin Əl-Cauf əyalətində husilərlə Səudiyyə Ərəbistanının dəstəklədiyi qüvvələr arasında döyüşlərin intensivləşdiyi bildirilir.

Husilərin səsləndirdiyi bu iddia ilə bağlı Səudiyyə Ərəbistanı tərəfindən hələlik rəsmi açıqlama verilməyib və məlumat müstəqil mənbələr tərəfindən təsdiqlənməyib.