Ət idxalında lider ölkələr açıqlandı

Azərbaycan Respublikasının Qida Təhlükəsizliyi Agentliyi (AQTA) ölkəyə ət idxalının əsas istiqamətlərini açıqlayıb. Hazırda Azərbaycana ən çox mal əti Ukrayna, Braziliya, Belarus, Hindistan və Rusiyadan gətirilir. Qoyun əti üzrə isə əsas idxalçı ölkələr Monqolustan, Rusiya və Birləşmiş Ərəb Əmirlikləridir.

Minval.info xəbər verir ki, AQTA tərəfindən ölkəyə idxal olunan və yerli istehsal edilən bütün qida məhsulları üzərində risk əsaslı nəzarət tədbirləri həyata keçirilir. Məhsul idxal edilməmişdən öncə ixracatçı ölkədəki epizootik vəziyyət təhlil edilir. Xarici ölkələrdən gətirilən diri heyvanlar, ət və ət məhsulları yüksək riskli məhsul qrupuna aid olduğu üçün ciddi təhlükəsizlik və keyfiyyət tələbləri üzrə nəzarətdən keçilir.

AQTA-nın regional bölmələrinin əməkdaşları yükə baxış keçirir, məhsullardan nümunələr götürülür və laborator sınağa cəlb edilir. Laborator analiz nəticələri qida təhlükəsizliyi tələblərinə cavab verdikdə, məhsulun dövriyyəyə buraxılmasına icazə verilir. Yüksək riskli məhsulların daşınması, satışı və dövriyyəsi zamanı etiketlənməyə, saxlama şəraitinə və temperatur rejiminə ciddi riayət edilməlidir. İstehlakçılar satıcıdan məhsulun müşayiətedici sənədlərini tələb edə bilərlər. Qida təhlükəsizliyi tələblərinin pozulması halları ilə rastlaşdıqda, Agentliyin “1003 – Çağrı Mərkəzi”nə zəng vuraraq məlumat verilə bilər.