“Sabirabad rayonunun İcra Hakimiyyətinin başçısı Cabbarov Siraqəddin Nəcəf oğlunu şəxsən tanımıram. Bir dəfə də olsun onunla görüşməmişəm. Bioqrafiyasına baxdım, 30 ildir icrada çalışır, onun 14 ilini başçı vəzifəsindədir”.

“Minval.info” xəbər verir ki, bunu hərbi ekspert Ədalət Verdiyev Feysbuk hesabında yazıb.

O, bildirib ki, sözügedən icra başçısı əsgərlikdə də olmayıb: “Ailəsindən də kiminsə 1-ci və 2-ci Qarabağ savaşında demirəm, hətta səngərdə xidmət etdiyini düşünmürəm.

Nə qədər ki, Vətənə əsgər kimi xidmət etməyənlər, Vətən uğrunda döyüşməyənlər, Vətənin çətin anında həyatı ilə risk etməkdən çəkinənlər yüksək vəzifələrdə təmsil olunacaqlar, problemlər də bitməyəcək.

Tək bir nümunə gətirim. Müharibə iştirakçısı general-polkovnik Əli Nağıyevin DTX-ya rəis təyin edilməsinə bu ölkədə kimsə etiraz etdimi? Xeyr. Nəticəsi də göz qabağında”.

Xatırladaq ki, Vətən Müharibəsi qazısı Elvin Cəfərov özünü yandıraraq intihar edib. O, intihardan əvvəl yaydığı videoda icra başçından şikayətlənmiş, onu qəbul etmədiyini bildirmişdi.

Elvinin yas mərasiminə qatılan başçı isə bütün iddiaların yalan olduğunu demişdi.

“Minval.info”