Binəqədidə yol təmiri: Sakinlər narazıdır

Binəqədi rayonunda Gülməmməd Ramazanov küçəsinin Emin Bağırov küçəsindən Həsən bəy Zərdabi küçəsinədək olan hissəsində təmir işləri aparılır. Bu səbəbdən ərazidə nəqliyyatın hərəkətində sıxlıq müşahidə edilir.

Minval.info xəbər verir ki, yaranmış vəziyyət sakinlərin narazılığına səbəb olub. Sakinlərdən biri, yolun iyul ayından bəri problemli olduğunu, lakin təmir işlərinin dərslərin başlamasına bir neçə gün qalmış başladığını bildirib. O, həmçinin Biləcəri istiqamətində də hərəkətin məhdudlaşdırılmasının Binəqədi qəsəbəsində nəqliyyat yükünü artırdığını qeyd edib.

Sakinlər, avtobusların aşağı məhəllədə dayanması səbəbindən insanların uzun məsafələr piyada getməyə məcbur qaldığını vurğulayıb. Onlar, yolun təmirə bağlanmasına baxmayaraq, nəqliyyatın hərəkətinin insanlar üçün tənzimlənmədiyini bildiriblər.