Rüstəm Behrudi: “Sən böyük şairsən!” dedilər

Rüstəm Behrudi: "Sən böyük şairsən!" dedilər

Bu gün doğum gününü qeyd edən Rüstəm Behrudi ilə ilk tanışlığımızda onun 23 yaşı vardı. O zaman mən “Yazıçı” nəşriyyatının baş redaktoru idim. Naxçıvandan bir gənc mənimlə görüşə gəlmişdi. O dövrdə “Gəncə qapısı” adlı şeir kitabım geniş oxucu kütləsi tərəfindən maraqla qarşılanırdı. Naxçıvan gəncləri mənə hədiyyə olaraq, dəmir üzərində döymə göndərmişdilər. Bu döymədə tikanlı məftillərin arasında qıvrılan Araz, bu məftilləri qırıb sərhəddə sancılan qılınc və çayın üstündən Güneylə Quzey arasında körpüyə dönmüş “Gəncə qapısı” kitabı təsvir olunmuşdu.

Minval.info xəbər verir ki, xalq şairi Sabir Rüstəmxanlı, Rüstəm Behrudiyə doğum günü münasibətilə göndərdiyi təbrik mesajında bu hadisəni xatırladıb. O, Rüstəmin ona təqdim etdiyi 6-7 şeiri oxuduqdan sonra, “sən şair deyilsən” deyərək, daha sonra “sən böyük şairsən!” ifadəsini işlədib. Bu sözləri şeirlərin ruhuna görə demişdi. Rüstəmi Bakıya dəvət edərək, uzun müddət birgə çalışdıqlarını və şeir məclislərində birgə iştirak etdiklərini qeyd edib.

Sabir Rüstəmxanlı, 46 il əvvəl Rüstəm Behrudinin şeirlərinə verdiyi qiymətdə yanılmadığını vurğulayaraq, onun türklük sevdası ilə dolu bir yolun yorulmaz yolçusu olduğunu bildirib. O, Rüstəmin poetik səsinin Azərbaycanın hüdudlarından çox uzaqlarda eşidildiyini və onun ruhundakı gənclik enerjisini itirməməsini arzulayıb. “Doğum gününü ürəkdən təbrik edirəm”, – deyə Sabir Rüstəmxanlı əlavə edib.