Gecikmiş 517 min manat işçilərə ödənildi

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti, yanvar-avqust ayları ərzində işəgötürənlər tərəfindən gecikdirilmiş 517,1 min manat məbləğində sosial xarakterli ödənişlərin işçilərə ödənilməsini təmin edib.

Minval.info xəbər verir ki, bu məbləğin 90 faizi əməkhaqqı, qalan 10 faizi isə zərərə görə ödənc, müavinət və kompensasiyalardan ibarət olub. Görülən tədbirlər nəticəsində işçilərə çatacaq vəsaitlər işəgötürənlər tərəfindən ödənilib.

Araşdırmalar zamanı Dövlət Əmək Müfəttişliyi Xidməti, 65 işçinin əmək müqavilələrinin qanunvericiliyin tələblərinə zidd olaraq xitam verildiyini aşkar edib. Xidmətin qanunvericiliyə uyğun olaraq həyata keçirdiyi tədbirlər nəticəsində həmin işçilər yenidən əvvəlki işlərinə bərpa olunublar.