Türkiyə vitse-prezidenti: İsrailin təxribatları qlobal enerji qiymətlərini artırır

Türkiyə vitse-prezidenti Cevdet Yılmaz bildirib ki, İsrailin təxribatları nəticəsində başlayan müharibələr qlobal enerji qiymətlərinə və milli iqtisadiyyatlara ciddi təzyiq göstərir. O, bu fikirləri İslam Əməkdaşlıq Təşkilatının İqtisadi və Ticarət Əməkdaşlığı Daimi Komitəsinin 42-ci Nazirlər Toplantısının açılışında söyləyib.

Minval.info xəbər verir ki, Yılmaz, İstanbul Konqres Mərkəzində keçirilən tədbirdə, enerji təhlükəsizliyinin təmin edilməsində mənbələrin və marşrutların müxtəlifləşdirilməsinin, regional əməkdaşlığın gücləndirilməsinin əhəmiyyətini bir daha vurğulayıb. O, həmçinin Fələstin xalqının üzləşdiyi işğal və zorakılıq məsələlərinə toxunaraq, bu vəziyyətin insanlığın vicdanında sağalması çətin olan yaralar açdığını qeyd edib.

Yılmaz, Türkiyə prezidenti Rəcəb Tayyib Ərdoğanın rəhbərliyi ilə diplomatik səylər nəticəsində əldə olunan atəşkəsə baxmayaraq, Qəzzada davam edən insan itkilərinə görə dərin kədərini ifadə edib. O əlavə edib ki, İsrailin Fələstində davam edən işğalı və hücumları regional sabitliyi təhdid edir.

ƏLAQƏLİ

Bunu da oxu

ABŞ-da iqtisadi çətinliklər seçki nəticələrinə təsir edə bilər

02.11.2026 - 16:54

Türkiyə vitse-prezidenti, eyni zamanda, Suriyanın birlik və ərazi bütövlüyünün təmin edilməsi istiqamətində atılan addımları dəstəklədiyini bildirib. O, COMCEC proqramı çərçivəsində Suriyada başlanan layihələrdən danışaraq, gələn il dəstəklərin davam edəcəyini vəd edib.

Cənubi Qafqazda sabitliyin artırılması və Azərbaycan ilə Ermənistan arasında davam edən sülh və normallaşma prosesinə dəstəyini ifadə edən Yılmaz, Türkiyənin Afrika ilə münasibətlərini gücləndirəcəyini də vurğulayıb.