Azərbaycan gimnastları Avropa Oyunlarına lisenziya qazandı

Azərbaycan gimnastları 2027-ci il iyunun 16-dan 27-dək Türkiyənin İstanbul şəhərində keçiriləcək IV Avropa Oyunlarına bir neçə növdə iştirak hüququ əldə ediblər. Aprelin 8-dən etibarən baş tutan təsnifat yarışlarında idmançılarımız müxtəlif beynəlxalq turnirlərdə uğurla çıxış edərək lisenziya qazanıblar.

Minval.info xəbər verir ki, aprelin 8-dən 12-dək Portuqaliyanın Portimao şəhərində keçirilən Avropa çempionatında Selcan Mahsudova və Maqsud Mahsudov fərdi proqramda, Maqsud Mahsudov və Hüseyn Abbasov isə sinxron proqramda lisenziya əldə ediblər. Sentyabrın 11-dən 13-dək İspaniyanın Pamplona şəhərində təşkil olunan aerobika gimnastikası üzrə dünya çempionatında isə qarışıq cütlük proqramında mübarizə aparan Mədinə Mustafayeva və Vladimir Dolmatov IV Avropa Oyunlarında iştirak hüququna yiyələniblər.

Qeyd edək ki, 2026-cı ildə keçiriləcək akrobatika gimnastikası və tamblinq üzrə dünya çempionatları, eləcə də 2027-ci ildə baş tutacaq idman gimnastikası və bədii gimnastika üzrə Avropa çempionatları IV Avropa Oyunlarına lisenziya qazandıran təsnifat xarakterli yarışlardır.