Naxçıvanda fabrik işçilərinin şikayətləri araşdırılır

Naxçıvanda yerləşən “Nati” Biskvit və Şokolad Fabrikinin işçiləri ağır iş şəraitindən narazılıq edirlər. Onlar bildirirlər ki, fabrikdə gündəlik iş saatları 12-14, bəzi hallarda isə 16 saata qədər uzanır. İşçilər şənbə günləri də işlədiklərini və əməkhaqlarının çox aşağı olduğunu qeyd edirlər.

Minval.info xəbər verir ki, işçilər bu şərtlərə etiraz edənlərin işdən çıxarıldığını və buna görə də digər əməkdaşların işlərini itirmək qorxusundan şikayət etməkdən çəkinmələrini iddia edirlər. Onlar aidiyyəti qurumlardan fabrikdə iş saatlarının, əməkhaqlarının və ümumi əmək şəraitinin yoxlanılmasını tələb edirlər.

Dövlət Əmək Müfəttişliyi Xidmətindən verilən məlumata görə, Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinə bu barədə hər hansı müraciət daxil olmayıb. Lakin əmək qanunvericiliyinin tələblərinin pozulması ilə bağlı iddialar araşdırılacaq və nəticələr barədə əlavə məlumat veriləcək.