Xətai rayonunda liftlər dayandı: Sakinlər təmir işləri ilə bağlı narazılıq içindədirlər

Xətai rayonunun Sarayevo küçəsində yerləşən 9 mərtəbəli binada liftlərin fəaliyyəti dayandırılıb, bu da sakinlərin narazılığına səbəb olub. Onların bildirdiyinə görə, binada aparılan təmir işləri səbəbindən liftlər işləmir.

Minval.info xəbər verir ki, hazırda sakinlər mənzillərinə gedib-gəlmək üçün pilləkənlərdən istifadə etmək məcburiyyətindədirlər. Bu vəziyyət xüsusilə yuxarı mərtəbələrdə yaşayan yaşlı insanlar, uşaqlı ailələr və hərəkət imkanları məhdud şəxslər üçün ciddi çətinliklər yaradır.

Sakinlər həmçinin liftlərin istismar müddətinin başa çatdığını və onların yenilənməsinə ehtiyac olduğunu vurğulayırlar. Onlar bu məsələ ilə bağlı aidiyyəti qurumlara dəfələrlə müraciət etdiklərini, lakin problemin həlli istiqamətində hələ də nəticə əldə olunmadığını bildirirlər.