Tramp xəbərdarlıq etdi: ABŞ hökuməti sentyabrda fəaliyyətini dayandıra bilər

ABŞ Prezidenti Donald Tramp federal hökumətin maliyyələşdirilməsi ilə bağlı xəbərdarlıq edib.

Minval.info xəbər verir ki, Tramp bildirib ki, Konqres oktyabrın 1-dək dövlət administrasiyasının maliyyələşdirilməsini nəzərdə tutan qanun layihəsini qəbul etməsə, hökumət sentyabr ayında fəaliyyətini dayandıracaq.

Ağ Ev rəhbəri çıxışı zamanı “Sentyabr ayında işlərin dayandırılması ilə üzləşəcəksiniz” ifadəsini işlədib.

Qeyd edək ki, ABŞ-də sonuncu qismən “şatdaun” bu ilin yanvarın 31-də başlayıb və fevralın 4-dək davam edib. Həmin dövrdə maliyyələşdirmə təsdiqlənənədək federal hökumətin bir sıra qurumlarının fəaliyyəti müvəqqəti dayandırılmışdı.

Məlumata görə, buna Minnesota ştatında baş verən hadisələrdən sonra Daxili Təhlükəsizlik Departamentinin maliyyələşdirilməsinin davam etdirilməsini nəzərdə tutan qanun layihəsinə demokrat senatorların dəstək verməməsi səbəb olmuşdu.