Şurnuxu kəndinin yarısı Azərbaycana təhvil verildi

Ermənistanın Şurnuxu kəndinin bir hissəsi Azərbaycana təhvil verilib. Bu barədə Ermənistan parlamentinin “Güclü Ermənistan” fraksiyasının deputatı Anuş Mirzoyan məlumat verib. O, bildirib ki, Şurnuxunun yarısı Azərbaycana təhvil verildikdən sonra Kərki kəndinin də qaytarılması gözlənilir.

Minval.info xəbər verir ki, Şurnuxuda 10-dan çox evin damına Azərbaycan bayrağı sancılıb. Kəndin bir hissəsi Ermənistan, digər hissəsi isə Azərbaycan ərazisində yerləşir. Ermənistan hökuməti bu ərazinin döyüşlərin qarşısını almaq məqsədilə verildiyini bildirib.

Qeyd edək ki, Şurnuxu kəndinin bir hissəsinin Azərbaycana qaytarılması 2021-ci ildə Ermənistan-Azərbaycan dövlət sərhədinin dəqiqləşdirilməsi prosesi çərçivəsində həyata keçirilib. Bu proses zamanı GPS koordinatları və sovet dövrünə aid xəritələrdən istifadə olunub. Nəticədə kəndin Azərbaycan ərazisində yerləşən hissəsi üzrə dövlət sərhədinin xətti dəqiqləşdirilib və ərazi Azərbaycanın nəzarətinə keçib.