Serhat Kılıçın müəmmalı ölümü: Yeni detallar ortaya çıxdı

Türkiyənin məşhur aktyoru Serhat Kılıçın evində ölü tapılması ilə bağlı yeni məlumatlar üzə çıxıb. Aktyorun sevgilisi Özlem Esmergül, Kılıçdan xəbər ala bilmədikdən sonra onun evinə gedərək, ehtiyat açarla içəri daxil olub və onu salondakı kresloda hərəkətsiz vəziyyətdə tapıb.

Minval.info xəbər verir ki, hadisə İstanbulun Kağıthane rayonunda baş verib. Həkimlərin müayinəsi nəticəsində Serhat Kılıçın vəfat etdiyi təsdiqlənib və onun cəsədi araşdırma üçün Ədli Tibb Müəssisəsinə aparılıb.

Özlem Esmergülün polisə verdiyi ifadəyə görə, o və Serhat Kılıç təxminən 8 il münasibətdə olublar. Esmergül, Kılıçın boyun yırtığından əziyyət çəkdiyini və çoxlu dərman qəbul etdiyini bildirib. Aktyorun ölüm səbəbi ilə bağlı araşdırmalar davam edir.