Pensiyalar 2027-ci ildən indeksləşdiriləcək!

2027-ci ildə Azərbaycanda sosial müdafiə və sosial təminat xərclərinin artımı gözlənilir. Milli Məclisin Əmək və sosial siyasət komitəsinin üzvü Vüqar Bayramov bildirib ki, bu xərclərin 2026-cı ilin təsdiq olunmuş proqnozu ilə müqayisədə cəmi 0,9% artması müəyyən narazılıqlara səbəb olub.

Minval.info xəbər verir ki, Vüqar Bayramovun sözlərinə görə, sosial müdafiə və sosial təminat xərcləri ümumi sosial xərclərin bir hissəsini təşkil edir. O qeyd edib ki, pensiya ödənişləri və müavinətlər əsasən Dövlət Sosial Müdafiə Fondunun büdcəsi vasitəsilə həyata keçirilir. Bu səbəbdən, əvvəlki illərlə müqayisədə bu maddə üzrə dəyişikliklər nisbətən az olub.

Deputat əlavə edib ki, 2026-cı ildə sosial müdafiə və sosial təminat xərcləri 4 milyard manatdan çoxdur, ümumi sosial xərclər isə 17,2 milyard manat təşkil edir. Növbəti ildən etibarən pensiyaların indeksləşdirilərək artırılması və digər istiqamətlərdə də artımların olması gözlənilir. Bu, sosial siyasət və sosial təminat tədbirlərinin prioritet olaraq qalacağını göstərir.