Paytaxtda günəşli havada çətir daşımaq: Kondisioner suyu yağış kimi yağıdır!

Paytaxtda günəşli hava şəraitində belə çətir daşımaq məcburiyyətində qalan sakinlər, bu vəziyyətin səbəbi olaraq binaların eyvanlarında düzgün quraşdırılmayan kondisionerləri göstərirlər. Kondisionerlərdən axan su, sakinlərin başına tökülərək narahatlıq yaradır.

Minval.info xəbər verir ki, yay aylarında kondisionerlərin istifadəsi artdıqca, bu texnikanın düzgün quraşdırılmaması problemi daha da aktuallaşır. Xüsusilə çoxmərtəbəli binalarda bu vəziyyət daha çox müşahidə olunur.

Sakinlərdən biri, “Binanın birinci mərtəbəsindən 15-ci mərtəbəsinə qədər kondisionerlər quraşdırılıb və hamısının suyu eyni anda tökülür. Bu da sanki yağış yağırmış kimi bir vəziyyət yaradır,” deyə bildirir.

Xəzər dənizində həlak olan qazaxıstanlı hərbçilərlə vida mərasimi təşkil edildi

ƏLAQƏLİ

Bunu da oxu

Xəzər dənizində həlak olan qazaxıstanlı hərbçilərlə vida mərasimi təşkil edildi

26.09.2026 - 13:05

Başqa bir sakin isə kondisionerlərdən axan suyun xüsusi borular vasitəsilə yönləndirilməsinin vacibliyini vurğulayır və “Şlanq və ya rezin boru vasitəsilə suyun aşağı yönləndirilməsi daha məqsədəuyğundur,” deyə əlavə edir.

Ekspertlər isə problemin yalnız sakinlərdən qaynaqlanmadığını, binaların layihələndirilməsi zamanı drenaj xətlərinin nəzərə alınmamasının da bu vəziyyətə səbəb olduğunu bildirirlər. “Drenaj xətti olmadığı üçün vətəndaşlar kondisioner sularını pərakəndə şəkildə mənzildən kənarlaşdırırlar. Bu da binanın fasadına və ümumi əmlaka ziyan vurur,” deyə ekspertlər qeyd edirlər.

Problemin həlli üçün sakinlərin bir araya gələrək xüsusi fond hesabına binanın fasadında uyğun drenaj xətləri quraşdırılması təklif olunur. Bu yanaşma həm binanın ümumi əmlakının qorunmasına, həm də qonşular arasında narazılığın qarşısının alınmasına kömək edər.