Azərbaycanda 100 məktəb adambaşı maliyyələşməyə keçir

Baku.ws-ın yazdığına görə, 2027-ci ildə Azərbaycanda əlavə olaraq 100 məktəb adambaşı maliyyələşmə mexanizminə keçəcək. Bu məqsədlə 223.8 milyon manat vəsait ayrılması planlaşdırılır. Bu barədə Milli Məclisin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında elm və təhsil nazirinin müavini Kənan Kərimzadə məlumat verib.

Kərimzadə bildirib ki, hazırda bu mexanizmdən faydalanan məktəblərin sayı 500-dür. O, həmçinin valideyn-dövlət-özəl tərəfdaşlığı çərçivəsində 8 min uşağın məktəbəqədər təhsilə cəlb edildiyini qeyd edib. Növbəti il bu sayın 12 minə çatdırılması və özəl sektorun inkişafı ilə daha çox uşağın məktəbəqədər təhsilə cəlb olunması planlaşdırılır.

Bu mexanizm çərçivəsində dövlət, özəl məktəbəqədər təhsil müəssisələrində təhsil alan hər bir uşaq üçün təhsil haqqının 70 faizini ödəyir. Gələn il bu təşəbbüs üçün 37.5 milyon manat vəsait nəzərdə tutulub və 2030-cu ilə qədər layihənin 30 min uşağı əhatə etməsi planlaşdırılır.

ƏLAQƏLİ

Bunu da oxu

Dünyada ərzaq bahalaşması Azərbaycandakı qiymətlərə təsir edə bilər

13.11.2026 - 13:34

Kərimzadə vurğulayıb ki, ayrılan vəsaitlərin böyük hissəsi dolayı yolla yenidən dövlətə qayıdır. Əgər islahatlar tam həyata keçirilərsə, 18 milyon manat Dövlət Sosial Müdafiə Fonduna, 12 milyon manat isə Dövlət Vergi Xidmətinə vergi gəliri kimi qayıdacaq.