Müəllimlərin işə qəbulu: 2 058 namizəd növbəti mərhələyə keçdi, sizin adınız siyahıda varmı?

Müəllimlərin işə qəbulu üzrə keçirilən müsabiqənin növbəti mərhələsinin nəticələri açıqlanıb. Namizədlərin şəxsi səhifələrinə göndərilən nəticələrə əsasən, 2 058 nəfər müsahibə mərhələsində iştirak etmək hüququ qazanıb.

Minval.info xəbər verir ki, Məktəbəqədər və Ümumi Təhsil üzrə Dövlət Agentliyi (MÜTDA) avqustun 8-10-da keçirilən vakansiya seçimi mərhələsinin nəticələrini açıqlayıb. Bu mərhələ, faktiki yaşayış rayonlarına uyğun olaraq həvəsləndirmə tədbirlərinin tətbiq edildiyi ümumi təhsil müəssisələrini əhatə edib.

MÜTDA-dan bildirilib ki, uğur qazanmayan və ya vakansiya seçimində iştirak etməyən namizədlər, müsabiqənin növbəti vakansiya seçimi mərhələsində iştirak edə bilərlər. Ümumi vakansiya seçimi mərhələsi isə avqustun 12-dən 15-dək davam edəcək.