Məktəblərdə fərdi yanaşma yox, vahid protokol!

Elm və təhsil naziri Emin Əmrullayev, bu gün keçirilən təhsil işçilərinin sentyabr konfransında çıxış edərək, məktəblərin inkişafı üçün vahid protokolun əhəmiyyətini vurğulayıb. O bildirib ki, “Filankəs müəllimin məktəbi” və ya “filankəs xanımın məktəbi” kimi ifadələr yaxşı anlayış deyil və bu, fərdi arzuların təzahürüdür. Nazir qeyd edib ki, 1, 2, 3 nömrəli məktəblər arasında fərq olmamalıdır və hər bir direktor məktəbin inkişafı üçün eyni cür çalışmalıdır.

Minval.info xəbər verir ki, Emin Əmrullayev, məktəblərin inkişafı üçün yaradıcı yanaşmanın əhəmiyyətini inkar etməsə də, hər kəsin özündən protokol yazmasının təhsilin keyfiyyətinə mənfi təsir göstərə biləcəyini bildirib. O, məktəb rəhbərlərinin protokolun hazırlanmasında iştirak edə biləcəyini, lakin vahid qaydalara riayət etməyin vacibliyini vurğulayıb.