Məktəb yollarında sıxlıq: Valideynlərə vacib xəbərdarlıq

Yeni tədris ilinin başlanması ilə əlaqədar olaraq, övladlarını məktəbə avtomobillə aparan valideynlərə və tələbələrə yol hərəkəti qaydalarına riayət etmələri tövsiyə olunur. Bu, paytaxtın küçə və prospektlərində nəqliyyat sıxlığının qarşısını almaq məqsədi daşıyır.

Minval.info xəbər verir ki, Daxili İşlər Nazirliyinin Nəqliyyatı İntellektual İdarəetmə Mərkəzinin (NİİM) mətbuat katibi Ömər Xıdırovun verdiyi məlumata görə, paytaxtda yerləşən təhsil müəssisələrinin ətrafında müşahidə kameraları vasitəsilə yollar nəzarətdə saxlanılacaq. Nəqliyyat sıxlığının yaranması hallarında yol polisinə məlumat veriləcək və işıqforlarda “yaşıl dalğa” rejimi tətbiq ediləcək.

Valideynlərə və tələbələrə tövsiyə olunur ki, şəxsi minik avtomobillərini mümkün qədər yeraltı və yerüstü dayanacaqlarda park etsinlər və nəqliyyat vasitələrini dayanma və durmanın qadağan olunduğu yerlərdə saxlamasınlar.