Kozinoğlunun məzarı açılır: Ölüm səbəbi araşdırılır

Türkiyə Milli İstehbarat Təşkilatının (MİT) Xarici Əməliyyatlar İdarəsinin keçmiş rəhbəri Kaşif Kozinoğlunun məzarı açılacaq. Silivri Baş Prokurorluğu tərəfindən aparılan istintaq çərçivəsində Ümraniyə qəbiristanlığında yerləşən məzardan sümük və torpaq nümunələri götürüləcək.

Minval.info xəbər verir ki, müayinələrdən sonra Məhkəmə-Tibbi Ekspertiza Şurasının Birinci İxtisaslaşmış Heyəti Kozinoğlunun ölüm səbəbini və hadisədə kənar şəxsin iştirakının olub-olmamasını müəyyən edəcək.

Xatırladaq ki, Kaşif Kozinoğlunun ölümü ilə bağlı cinayət işi 15 il sonra yenidən açılıb və bu işlə əlaqədar bir neçə nəfər şübhəli şəxs qismində saxlanılıb. Kozinoğlu, FETÖ-cü sabiq prokuror Zəkəriyyə Öz tərəfindən aparılan istintaq çərçivəsində həbs edilmiş və 2011-ci ilin 12 noyabrında Silivri həbsxanasında vəfat etmişdi. O zaman istintaq onun ölümünün təbii səbəblərdən qaynaqlandığını bildirmişdi.