İsti kakaonun möcüzəsi: Ürək sağlamlığını necə dəstəkləyir?

Gündə iki fincan flavanol baxımından zəngin isti kakao içmək, qan damarlarının sağlamlığına müsbət təsir edə bilər.

Minval.info xəbər verir ki, həkim Uilyam Li bu barədə podkast çıxışında danışıb. O, flavanolla zəngin kakao içkisinin müntəzəm istehlakının qan damarlarının bərpasında iştirak edən dövran edən hüceyrələrin sayını artırdığını bildirib. Burada söhbət adi şəkərli isti şokoladdan deyil, tərkibində ən azı 80 faiz kakao olan və şəkəri minimum olan məhsullardan gedir.

Bu iddia, 2010-cu ildə Kaliforniya Universiteti tərəfindən aparılmış kiçik bir araşdırmaya əsaslanır. Tədqiqatda, ürəyin tac damar xəstəliyindən əziyyət çəkən 16 nəfər, 30 gün ərzində gündə iki dəfə yüksək flavanollu kakao içkisi qəbul edib. Nəticələr, qan damarlarının funksiyasında yaxşılaşma və damarların bərpası ilə əlaqəli hüceyrələrin sayında artım olduğunu göstərib.