Əraqçidən ABŞ-yə SƏRT MESAJ: “Hörmüz boğazındakı hüquqlarımızı sonadək qoruyacağıq”

İran ABŞ-nin təzyiqlərinə boyun əyməyəcəyini və milli maraqlarını qorumaqda qərarlı olduğunu bəyan edib.

Minval.info xəbər verir ki, bunu İranın xarici işlər naziri Abbas Araghchi Qırğızıstanda keçirilən Şanxay Əməkdaşlıq Təşkilatının Xarici İşlər Nazirləri Şurasının iclası çərçivəsində jurnalistlərə açıqlamasında deyib.

Nazirin sözlərinə görə, İranın Rusiya və Çinlə məsləhətləşmələri davamlı xarakter daşıyır. O bildirib ki, tədbir çərçivəsində Rusiyanın xarici işlər naziri Sergey Lavrov və Çinin xarici işlər naziri Wang Yi ilə ikitərəfli görüşlər keçirərək geniş məsələlər spektrini müzakirə edib.

ƏLAQƏLİ

Bunu da oxu

Misir parlamenti Səudiyyə Ərəbistanına hərbi dəstək məsələsini müzakirə edir

26.10.2026 - 17:44

Əraqçi əlavə edib ki, görüşlərdə Tehran və Vaşinqton arasında vasitəçilik təşəbbüsü ilə çıxış edən Pakistanın rolu da müzakirə olunub. Bununla yanaşı, o vurğulayıb ki, əsas problem vasitəçinin olmaması deyil, ABŞ-nin siyasətidir.

“İran artıq sübut edib ki, ABŞ-yə tabe olmayacaq. Biz heç vaxt güc, təzyiq və hədə-qorxu dilinə cavab verməyəcəyik. Təhdidlərdən qorxmuruq, təzyiqlərə boyun əyməyəcəyik və ultimatumlar dilini qəbul etmirik”, – deyə İran XİN rəhbəri bildirib.

Əraqçi qeyd edib ki, İranın xarici siyasətinin əsas prinsiplərindən biri ölkənin milli maraqlarının, qanuni hüquqlarının, eləcə də Hörmüz boğazı və Fars körfəzindəki hüquqlarının müdafiəsidir. Onun sözlərinə görə, Tehran bu məqsədlərə nail olana qədər fəaliyyətini davam etdirəcək.