Çağdaş qəzetçilik: Sosial medianın yüksəlişi

Çağdaş dövrdə qəzetçilik anlayışı sürətlə dəyişir. Kağız qəzetlər artıq tarixə çevrilməkdədir və bu, yalnız qəzet köşklərinin lotereya və elektron siqaretlər satılan məkana çevrilməsi ilə məhdudlaşmır. Oxumaq vərdişi dəbdən düşdüyü üçün sosial media fenomenləri, blogerlər, influenserlər və yutuberlər daha çox izləyici cəlb edirlər. Lakin ciddi və alternativ fikirləri eşitmək istəyənlər üçün obyektiv və peşəkar xəbərlər hələ də əhəmiyyətini qoruyur.

Minval.info xəbər verir ki, türkiyəli jurnalist Cüneyit Özdəmirin Yutub kanalında gündəmin müzakirəsinə həsr olunan verilişləri geniş izləyici kütləsi tərəfindən maraqla qarşılanır. Bu verilişlərdə Türkiyə və dünya gündəmində baş verən hadisələr peşəkar ekspertlərin iştirakı ilə müzakirə edilir və izləyicilərə düşünmək imkanı yaradılır.

Bu gün Azərbaycan sosial media məkanında belə səviyyəli müzakirələrə rast gəlmək çətindir. Lakin Şərif Ağayarın “Bakupost”da apardığı “Yazıçı postu”nda bu istiqamətdə müəyyən işartılar görünür və inkişaf etdirilərsə, dolğun bir layihəyə çevrilə bilər. Klassik qəzetçilər yeniliklərə çevik reaksiya verməli və peşəkarlığın üstünlük qazanacağına inanmalıdırlar.