“Bu təbii fəlakətdir, texnogen iz axtarmağa dəyməz”

“Türkiyədə baş verən zəlzələnin episentri o qədər dərində, gücü isə o qədər çoxdur ki, hər hansı antropogen (insan) amil istisna olunur. Bu, təbii fəlakətdir, texnogen iz axtarmağa dəyməz. Təəssüf ki, dağıntılar böyük, insan itkiləri isə çoxdur”.

Bunu Bakupost.az -a açıqlamasında Vətəndaşların Əmək Hüquqlarını Müdafiə Liqası İcraiyyə Komitəsinin sədri, hüquqşünas Sahib Məmmədov deyib.

O bildirib ki, hazırda Türkiyədə baş verən zəlzələ ilə bağlı müxtəlif fikirlər irəli sürülür:

“Hesab edirəm ki, belə güclü zəlzələnin texnogen yolla baş verməsi mümkün deyil. Texnogen yolla hansısa kiçik titrəyişlər yaratmaq olar. Amma yerin dərinliklərində miqyası Hiroşima və Naqasakiyə atılan atom bombasından 30-40 dəfə çox olan bir titrəməni, belə güclü zəlzələni yaratmaq mümkün deyil.​ İrəli sürülən fərziyyələr elmi təsdiqini tapmır”.