Böyük Britaniyanın Breksit məsələləri üzrə naziri istefa verib

Böyük Britaniyanın Breksit məsələləri üzrə naziri Dominik Raab istefa verib.

AZƏRTAC TASS informasiya agentliyinə istinadla xəbər verir ki, Dominik Raab Böyük Britaniyanın Avropa İttifaqının tərkibindən çıxması barədə baş nazir Tereza Meyin təklif etdiyi saziş layihəsini dəstəkləmədiyi üçün istefaya getdiyini bildirib.

Xatırladaq ki, Böyük Britaniyanın Nazirlər Kabineti noyabrın 14-də axşam saatlarında 5 saatlıq müzakirələrdən sonra Brexit üzrə sazişin mətnini təsdiqləyib. Buna baxmayaraq, Krallığın hökumət üzvlərinin təxminən 30 faizi sənədin əleyhinə çıxıb. Eyni vaxtda Avropa Komissiyası da Böyük Britaniyanın Avropa İttifaqının tərkibindən çıxması barədə saziş layihəsini elan edib. Layihə bu prosesin bütün vacib aspektlərini – keçid dövrünü, maliyyə məsələlərini, vətəndaşların hüququnu, həmçinin İrlandiya, Cəbəllütariq və Kipr üzrə protokolları əhatə edir.