Bakının bəzi ərazilərində işıq fasiləsi olacaq

Bu gün Bakının Yasamal rayonu, eləcə də Ağdaş, Tərtər və Yevlax rayonlarının bəzi ərazilərində elektrik enerjisinin verilişində məhdudiyyətlər olacaq. “Azərişıq” ASC-dən verilən məlumata görə, bu məhdudiyyətlər elektrik enerjisinin keyfiyyət göstəricilərinin artırılması və artan yük tələbatının qarşılanması məqsədilə həyata keçiriləcək. Sentyabrın 10-da Yasamalda Transformator Məntəqəsində, Ağdaş, Tərtər və Yevlaxda isə 6 və 10 kV-luq hava xəttlərində təmir işləri və xəttlərə toxunan yaşıllıqların budanması işləri aparılacaq.

Minval.info xəbər verir ki, Yasamal Rayon Enerji Təchizatı və Satışı İdarəsinin xidməti ərazisində saat 10:00-dan 13:00-dək Abbas Mirzə Şərifzadə, Arif Mehdiyev, Nazim Hikmət, Vasif Əliyev, Zaur Kərimov küçələri, eləcə də Yeni Yasamal-2 yaşayış massivinin bir hissəsində elektrik enerjisinin verilişində məhdudiyyət tətbiq olunacaq. Ağdaş Elektrik Şəbəkəsinə daxil olan Ləki qəsəbəsi və Qaradağlı kəndinin bəzi ərazilərində saat 10:00-dan 13:00-dək enerjinin verilişi müvəqqəti dayandırılacaq.

Planlı fasilə saat 10:00-dan 14:00-dək Tərtər Elektrik Şəbəkəsinin ərazisində yerləşən Hacıqərvənd kəndini də əhatə edəcək. Yevlaxın Aşağı Qarxun, Ərəbbəsrə, Meyvəli, Yuxarı Qarxun kəndlərinin bir sıra yerlərində saat 10:00-dan 15:00-dək enerjinin verilişində fasilə yaranacaq. Görülən işlər yekunlaşdıqdan sonra həmin ərazilərdə abonentlər daha keyfiyyətli və dayanıqlı elektrik enerjisi ilə təmin olunacaqlar.