Bakıda İmam Əliyə qeyri-adi doğum günü keçirildi - "Bu, yolverilməzdir..."- VİDEO

İlahiyyatçı Emil Rahiloğlu: “Bunu qətiyyətlə pisləyirəm, belə mövludun keçirilməsi yolverilməzdir”

Azərbaycanda Hz.Əlinin mövlud günü ilə bağlı keçirilən mərasim birmənalı qarşılanmayıb.

Minval.info xəbər verir ki, sosial şəbəkələrdə yayılan görüntülərdə Hz.Əlinin doğum günü üçün üzərində şəkli olan tort hazırlandığı görünür.

Daha sonra tortun üzərindəki şamlar yandırılaraq, “Happy birthday” mahnısı səsləndirilib. Tortun ətrafına toplaşan qadınlar əl çalaraq, bu anların videosunu çəkmək üçün də xüsusi maraq göstəriblər.

Bəzi dindarlar bunun dini savadsızlıqdan edildiyini, bəziləri isə böyük hörmətsizlik olduğunu deyirlər.

Mövzu ilə əlaqədar olaraq minval.info ilahiyyatçı Emil Rahiloğlunun fikirlərini öyrənib.

O, mövlud gününün keçirilməsini haram buyuran heç bir Quran ayəsinin olmadığını bildirib:

“Əlsində, dinimizdə belə bir qadağa yoxdur. Burada tək problem Hz.Əlinin şəklinin əks edilməsidir. Kim onu görüb ki, şəklini də çəksin. Geri qalanlar isə insanların şəxsi əqidəsindən, imanından doğan bir haldır. Necə ki, insanlar öz yaxınına, əzizinə belə bir mövlud bayramı tutur, eləcə də öz imamına belə bir mövlud keçirə bilər. Bunun dində heç bir şirki, maneəsi yoxdur. Əgər kimə bunun əksinə bir ayə, hədis deyərsə, onların cavablarını da verə bilərik. Qurani-Kərimdə bunu qadağan edən nə bir ayə var, nə də başqa bir göstəriş. Əksinə, “Bizim şad günümüzə şadlanın, qəm günümüzdə kədərlənin”- deyə bir hədis var. Yəni insanların mövludu şadyanalıqla keçirməsində heç bir problem yoxdur”.

Lakin xanımlardan ibarət bayram tədbirinin keçirilməsinə gəldikdə isə E.Rahiloğlu bunu qətiyyətlə pislədiyini vurğulayıb: “Bu, yolverilməzdir. Mövlud tədbirləri maarifyüklü olmalıdır. Yəni pozitiv əhval-ruhiyyə ilə yanaşı məsumların həyatlarından, fəzilətlərindən, əməllərindən danışmaq və insanları belə yaşamağa təşviq etmək lazımdır”.

Minval.info