Bakıda metro keçidi tikintisi sakinləri narahat edir: Təhlükəsizlik sualları artır

Bakının Məhəmməd Hadi küçəsində yerləşən çoxmərtəbəli binanın sakinləri yaxınlıqda aparılan tikinti işlərindən narahatdırlar. Onlar, binanın altında ticarət mərkəzinə metro keçidi üçün işlərin aparıldığını və bu vəziyyətin yaşayış şəraitlərinə təsir etdiyini iddia edirlər.

Minval.info xəbər verir ki, binanın komendantı İsa Talıblı, bu işlərin binaya deyil, metro infrastrukturuna aid olduğunu və yaşayış binasına təsir etmədiyini bildirib.

“Bakı Metropoliteni”ndən verilən məlumata görə, “Həzi Aslanov” stansiyasının 5-ci çıxışı istiqamətində yerləşən ticarət mərkəzi tərəfindən birbaşa keçidin təşkili üçün müraciət edilib. Bu müraciətə baxılaraq, texniki şərtlər, tikinti norma və qaydaları, eləcə də təhlükəsizlik tələblərinin tam təmin edilməsi şərti ilə keçidin inşasına icazə verilib. Yeni keçid sərnişinlərin hərəkətini daha rahat və təhlükəsiz edəcək, həmçinin sərnişin axınının səmərəli yönləndirilməsinə kömək edəcək.