Azərbaycanda yeni qızıl yatağı tapıldı: 2 min yeni iş yeri açılacaq

Balakən rayonundakı qızıl-gümüş yataqları Azərbaycana 3 milyard manat gəlir gətirəcək.

İslamazeri.com-un məlumatına görə, bu barədə “AzerGold” QSC-nin sədri Zakir İbrahimov prezident İlham Əliyevin sədrliyi ilə Nazirlər Kabinetinin iclasındakı çıxışında bildirib.

Onun sözlərinə görə, Balakən rayonu ərazisində yerləşən və mis, sink, gümüş, qızıl, qurğuşun ehtiyatlarına görə nəinki Azərbaycan, hətta Avropa üçün böyük strateji əhəmiyyətə malik Filizçay polimetal yatağı üzrə ilkin iqtisadi qiymətləndirmə sənədi nüfuzlu beynəlxalq məsləhətçi şirkət tərəfindən hazırlanmaqdadır:

“Filizçay yatağının ən azı 12 illik istismarı nəticəsində ölkə iqtisadiyyatına ümumilikdə üç milyard manata yaxın vəsaitin daxil olması və 2000-dən artıq iş yerinin açılması gözlənilir.

Bundan başqa, Balakən rayonu ərazisində yerləşən Mazımçay yatağında ehtiyatların təsdiqi məqsədi ilə də buruq-qazma işləri aparılır”- deyə Zakir İbrahimov qeyd edib.