Orduda köhnə qaydalar dəyişməlidir: Ekspert çağırışı

Azərbaycan Ordusu müasir silah və hərbi texnika ilə təchiz olunaraq inkişafını davam etdirir. Bu tədbirlər nəticəsində ordumuz dünyanın ən güclü orduları arasında yer alır. Lakin, orduda hələ də sovet dövründən qalmış bəzi köhnəlmiş qaydalar mövcuddur. Məsələn, hərbi salam vermə qaydası hələ də 1975-ci il hərbi nizamnaməsinə uyğun olaraq həyata keçirilir. Halbuki, NATO ölkələrində, o cümlədən Türkiyədə, bu qayda fərqlidir.

Minval.info xəbər verir ki, hərbi ekspert Üzeyir Cəfərov hərbçilərin geyim qaydalarında dəyişikliklərə ehtiyac olduğunu vurğulayıb. O bildirib ki, hərbçilərimiz isti hava şəraitində sərt formalı kitellər geyinmək məcburiyyətində qalırlar ki, bu da diskomfort yaradır. NATO ölkələrinin ordularında isə hərbi geyimlər daha rahat və sadədir. Üzeyir Cəfərovun fikrincə, Azərbaycanda da belə bir geyim sistemi tətbiq edilməlidir və alternativ xidmət haqqında qanun qəbul olunmalıdır.

Ekspert əlavə edib ki, Azərbaycanda bu sahədə təşəbbüs göstərməkdən çəkinirlər. O qeyd edib ki, Nazirlər Kabinetinin qərarları bəzən Azərbaycan qanunlarından üstün tutulur və II Qarabağ müharibəsi iştirakçılarına I Qarabağ müharibəsi iştirakçılarına nisbətən üstünlük verilir. Üçüncü bir savaşın olmayacağına kim zəmanət verə bilər? Ölkəmizin müdafiəsinin təşkili üçün lazımi tədbirlər görülməlidir.