Ağdamda gizli niyyət: Pua görüntüləri yanğın sirrini açdı

Ağdam rayonunda son günlərdə baş verən yanğın hadisələrinin səbəblərini araşdırmaq məqsədilə polis əməkdaşları tərəfindən geniş tədbirlər həyata keçirilib.

Minval.info xəbər verir ki, araşdırmalar çərçivəsində əraziyə göndərilən pilotsuz uçuş aparatı (PUA) və video-müşahidə kameralarının görüntüləri təhlil edilib. Bu materiallar əsasında Ağdam və Ağcabədi inzibati ərazilərinin kəsişməsində yerləşən əkin sahələrinin qəsdən yandırıldığı müəyyən olunub.

İlkin araşdırmalar nəticəsində, 77 PT 225 dövlət qeydiyyat nişanlı “Niva” markalı avtomobili idarə edən 29 yaşlı Səbuhi Hüseynlinin bu hadisəni törətdiyinə dair əsaslı şübhələr ortaya çıxıb və o, saxlanılıb. Hadisə ilə bağlı cinayət işi açılıb və S.Hüseynlinin təqsirləndirilən şəxs qismində istintaqa cəlb edilməsi, hadisənin bütün aspektlərinin tam araşdırılması üçün zəruri prosessual tədbirlər davam etdirilir.