Yol polisi doğum gününə 1 gün qalmış ölümlə üzləşən uşağı xilas etdi - VİDEO

Baş Dövlət Yol Polisi İdarəsinin Ekoloji Nəzarət bölüyünün əməkdaşı baş serjant Vüqar Cəbrayılov körpənin həyatını xilas edib.

Minval.info “avtosfer.az”a istinadən xəbər verir ki, Ekologiya postunun ərazisində xidmət apararkən üzərində taksi nişanı olan “Opel” markalı avtomobil postda saxlayıb.

Sürücü bildirib ki, avtomobildə azyaşlı uşaq var və vəziyyəti pisləşib.

Vüqar Cəbrayılov dərhal məsələyə müdaxilə edib. Məlum olub ki, yüksək hərarəti olduğu üçün körpə qıcovma olub.

Yol polisi əməkdaşı körpəyə ilkin tibbi yardım göstərərək onun dilinin qatlanmasına mane olub. Ardınca uşaq nəfəs alaraq özünə gəlib.

Yol polisi əməkdaşı uşağı partul avtomobili ilə təcili olaraq Respublika Xəstəxanasına çatdırıb. Həkimlərin müdaxiləsindən sonra körpənin həyatı xilas edilib.

Süleyman adlı həmin uşağın hadisənin səhəri günü 1 yaşı tamam olub. Doğum günün mərasiminə YPX əməkdaşı Vüqar Cəbrayılov da dəvət olunub.

Məclis zamanı körpənin həyatını xilas edən yol polisinə valideynlər və taxınlar tərəfindən təşəkkür olunub.