Yaşıllıqlara 200 min manatlıq ziyan: Araşdırma başladı

Azərbaycanda son bir həftə ərzində yaşıllıqlara 200 min manata yaxın ziyan vurulub. Bu barədə Dövlət Ekoloji Təhlükəsizlik Xidməti məlumat yayıb. Minval.info xəbər verir ki, Bakı, Sumqayıt, Gəncə şəhərləri və Salyan rayonunda keçirilən nəzarət tədbirləri zamanı yaşıllıqların qanunsuz kəsilməsi faktları aşkar edilib.

Araşdırmalar nəticəsində Bakı şəhəri Nizami rayonunun Özbəkistan və Şirin Mirzəyev küçələrində, Nəsimi rayonunun Novruzov qardaşları küçəsi 75 ünvanında, Yasamal rayonunun Mətbuat prospektində, Sumqayıt şəhərinin Səməd Vurğun və C.Cabbarlı küçələrində, eləcə də Nizami küçəsi ilə Polad Həşimov küçəsinin kəsişməsində, Gəncə şəhərinin 3-cü mikrorayon ərazisində və Salyan rayonunun inzibati ərazisində ağacların qanunsuz kəsilməsi nəticəsində yaşıllıqlara 199 620 manat məbləğində ziyan dəydiyi müəyyən edilib.

Hər bir fakt üzrə yaşıllıqlara dəymiş ziyanın məbləği cinayət tərkibi yaratdığından, məsələyə hüquqi qiymət verilməsi üçün toplanmış materiallar hüquq-mühafizə orqanlarına göndərilib.