Türkiyədə yanğın: Azərbaycanlı bloger cütlük təhlükədə

Azərbaycanlı məşhur bloger cütlük Leyli və İqo hazırda Türkiyənin Fethiye bölgəsində baş verən meşə yanğınlarının təsirindən narahatlıq içindədirlər. Cütlük istirahət üçün getdikləri bu bölgədə yanğınların onların qaldıqları evin yaxınlığına çatması səbəbindən böyük panika yaşayıb.

Minval.info xəbər verir ki, İqo sosial şəbəkə hesabında yanğının evlərinin yaxınlığında olduğunu bildirib. O, “Yanğın düz evimizin yanındadır, meşə yanır… Əşyalarımızı götürüb çıxmalı oluruq. Hər şey sanki filmlərdəki kimidir, çox qorxunc mənzərədir. Allah köməyimiz olsun. İnşallah, tezliklə yanğını söndürə bilərlər. İnşallah, bu dəhşətli gün tezliklə bitər. Tüstüdən nəfəs almaq belə mümkün deyil. Allah hamını qorusun və kömək olsun” sözləri ilə vəziyyəti təsvir edib.

Bloger Leyli də yaşadığı panikanı izləyiciləri ilə bölüşərək, “Allahım, sən qoru. Evimizin yanı yanır, işıqlar-filan kəsildi. Yanğın hər saniyə qalxır, evə yaxınlaşır… Dualarınızı əsirgəməyin!!!” ifadələrini qeyd edib.