Tubukənddə həyat dayanır: Sakinlər infrastruktur problemləri ilə mübarizədə tək qalıb

İsmayıllı rayonunun Tubukənd kəndi, təbiəti və havası ilə tanınsa da, burada yaşayan sakinlər ciddi infrastruktur problemləri ilə üzləşirlər.

Minval.info xəbər verir ki, kənddə əsasən 1990-cı illərdən etibarən Qarabağ bölgəsindən köç edən vətəndaşlar məskunlaşıb. Ancaq bu müddət ərzində kənddə yol, qaz və su təminatı kimi əsas xidmətlərdən məhrum qalıblar. Sakinlər, xüsusilə qış aylarında isinmək üçün meşədən odun tədarük etmək məcburiyyətində qaldıqlarını bildirirlər. Problemlərini aidiyyəti qurumlara dəfələrlə çatdırsalar da, hələ də bir nəticə əldə olunmayıb.

“Suyumuz çox çətinliklə gəlir, yolumuz isə demək olar ki, yoxdur. Bir xəstəmiz olsa, vaxtında xəstəxanaya çatdıra bilmirik, yollarda əziyyət çəkirik. Kənddə qaz xətti isə ümumiyyətlə, yoxdur”, – deyə kənd sakinlərindən biri vəziyyəti izah edir.