Şəkidə zipline faciəsi: 2 ölüm, istintaq başladı

Sentyabrın 8-də Şəki rayonunun Baş Küngüt kəndində yerləşən ‘Şəki yaylası’ istirahət mərkəzində iki nəfərin hündürlükdən yıxılaraq həyatını itirməsi ilə nəticələnən faciə baş verib. Hadisə zamanı 1999-cu il təvəllüdlü Ucal Bayramov və 1995-ci il təvəllüdlü Coşqun Məmmədzadə ‘Zipline’ əyləncəsindən istifadə edərkən kanat sisteminin bərkidildiyi metal konstruksiyanın deformasiyaya uğraması nəticəsində əsas mexaniki qurğu kanatdan çıxıb və əlavə təhlükəsizlik avadanlığı zədələnib. Nəticədə hər iki şəxs yerə düşərək hadisə yerində vəfat edib.

Minval.info xəbər verir ki, Şəki rayon prokurorluğu hadisə ilə bağlı cinayət işi açıb. Azərbaycan Respublikası Cinayət Məcəlləsinin 314.3-cü (iki şəxsin ölümünə səbəb olan səhlənkarlıq) maddəsi ilə başlanan iş üzrə ibtidai istintaq aparılır. Hadisənin bütün hallarının, o cümlədən başvermə səbəbləri və şəraiti, ‘Zipline’ qurğularının texniki vəziyyəti və istismarının təhlükəsizlik tələblərinə uyğunluğu araşdırılır.

Prokurorluq, media nümayəndələrindən və sosial şəbəkə istifadəçilərindən hadisə ilə bağlı dəqiqləşdirilməmiş məlumatların yayılmasından çəkinmələrini və istintaq sirrinin qorunmasına xələl gətirə biləcək məlumatların paylaşılmamasını xahiş edir.