Sabunçuda su qəzası: İçməli su israfı!

Sabunçu rayonunda, Balaxanı və Məmmədli kəndləri arasında yerləşən ərazidə su axıntısı müşahidə olunub. Əsas kollektorda baş verən qəza nəticəsində içməli su çöllük əraziyə axaraq gölə bənzər sahə yaradıb.

Minval.info xəbər verir ki, sakinlər artıq 2-3 gündür bu vəziyyətin davam etdiyini bildirirlər. Onlar içməli su ilə bağlı çətinlik yaşadıqları halda, böyük həcmdə suyun əraziyə axmasının narahatlıq doğurduğunu qeyd edirlər. Sakinlərin sözlərinə görə, qəza ilə bağlı ərazidə uzun müddət heç bir müdaxilə edilməyib.

İri Şəhərlərin Birləşmiş Su Təchizatı Xidmətindən verilən məlumata görə, Balaxanıda müşahidə olunan su axıntısı vantuzda baş verən nasazlıqla əlaqədardır. Bakı Sukanal İdarəsinin briqadası əraziyə cəlb olunub və problemin aradan qaldırılması istiqamətində işlər aparılır.