"Qarabağ"da ciddi itki

“Qarabağ”ın zədəli futbolçusu İnnosent Emeqaranın durumuna aydınlıq gəlib.

Klubun mətbuat xidmətindən Minval.info-ya verilən məlumata görə, 29 yaşlı hücumçu əməliyyat olunacaq. Cərrahi müdaxilə xarici ölkələrin birində baş tutacaq. İsveçrəli oyunçu dizinin menisk hissəsindən xəsarət alıb. O, ilin sonuna qədər yaşıl meydanlardan kənarda qalacaq.

“Qarabağ”da daha bir itki isə müdafiəçi Yakub Jezniçakla bağlıdır. Polşalı legioner Azərbaycan Premyer Liqasının XII turunda “Sabah”la 1:1 hesablı heç-heçə etdikləri görüşdə 4-cü sarı vərəqəni alaraq, cəzalı duruma düşüb. O, növbəti tur “Keşlə” ilə ev oyununu buraxmalı olacaq. Jezniçak bu görüşdə həm də komandasının bərabərlik qolunu vurub. Bu, 32 yaşlı oyunçunun Ağdam təmsilçisinin heyətində ilk qolu olub.

Qeyd edək ki, İnnosent Emeqara “Qarabağ”ın Azərbaycan Premyer Liqasının XII turunda “Sabah”la (1:1) matçdan öncə isinmə hərəkətləri zamanı xəsarət alıb.