Müdafiə nazirliyinin sabiq rəisinin cəzası dəyişdi: 8 illik həbs şərti olaraq tətbiq edildi

Müdafiə Nazirliyinin ‘İstirahət evi’nin keçmiş rəhbəri İlham Haqverdiyevin rüşvət alma ittihamı ilə bağlı məhkəmə qərarı yenidən nəzərdən keçirilib.

Minval.info xəbər verir ki, Bakı Apellyasiya Məhkəməsi prokurorluğun apellyasiya protestinə baxaraq, qərarı qismən dəyişdirib. İlham Haqverdiyevin cərimə cəzası ləğv edilərək, ona 8 il azadlıqdan məhrum etmə cəzası verilib. Lakin bu cəza Cinayət Məcəlləsinin 70-ci maddəsinə əsasən şərti olaraq tətbiq edilib və iki il sınaq müddəti müəyyən edilib.

Əvvəlki məhkəmə qərarına görə, Bakı Hərbi Məhkəməsi İlham Haqverdiyevə 15 min manat cərimə cəzası vermişdi və o, məhkəmə zalından azadlığa buraxılmışdı. Müdafiə Nazirliyinin apardığı araşdırmalar nəticəsində onun qanun pozuntusuna yol verdiyi aşkarlanmış və məsələ hüquqi müstəvidə həll olunması üçün Hərbi Prokurorluğa göndərilmişdi. İlham Haqverdiyev Cinayət Məcəlləsinin 311-ci maddəsi ilə, yəni rüşvət alma ittihamı ilə mühakimə olunub.