Kiyevdə yüksəksəviyyəli görüş: Zelenski Prezident İlham Əliyevə minnətdarlığını bildirdi

Ukraynada rəsmi səfərdə olan Azərbaycanın xarici işlər naziri Ceyhun Bayramov bu ölkənin Prezidenti Volodimir Zelenski ilə görüşüb.

Minval.info xəbər verir ki, Xarici İşlər Nazirliyinin yaydığı məlumata görə, Kiyevdə keçirilən görüşdə iki ölkə arasındakı strateji tərəfdaşlıq münasibətlərinin hazırkı vəziyyəti və gələcək inkişaf perspektivləri diqqət mərkəzində olub. Tərəflər siyasi dialoqun dərinləşdirilməsi, enerji və nəqliyyat layihələri, eləcə də humanitar sahədə əməkdaşlığın genişləndirilməsi ətrafında fikir mübadiləsi aparıblar.

Müzakirələr zamanı gələn il Bakı ilə Kiyev arasında diplomatik əlaqələrin qurulmasının 35 illiyinin tamam olacağı xatırladılıb. Qeyd olunub ki, keçən dövr ərzində qarşılıqlı səfərlər və yüksək səviyyəli kontaktlar ikitərəfli münasibətlərin inkişafında müstəsna rol oynayıb. Bu xüsusda Volodimir Zelenskinin bu ilin aprelində Azərbaycana reallaşan səfəri və əldə olunan razılaşmaların əlaqələri yeni mərhələyə qaldırdığı vurğulanıb.

ƏLAQƏLİ

Bunu da oxu

Ceyhun Bayramovun Ukrayna səfəri davam edir — Növbəti görüş

07.08.2026 - 00:38

Görüşdə regional təhlükəsizlik və Ukraynadakı mövcud hərbi-siyasi vəziyyət də geniş təhlil olunub. Azərbaycan tərəfi Ukraynanın beynəlxalq səviyyədə tanınmış sərhədləri daxilində suverenliyini və ərazi bütövlüyünü bir daha qətiyyətlə dəstəklədiyini bəyan edib.

Öz növbəsində Ukrayna lideri Volodimir Zelenski göstərilən ardıcıl humanitar yardımlara görə Prezident İlham Əliyevə və Azərbaycan hökumətinə dərin minnətdarlığını bildirib. Sonda tərəflər bütün istiqamətlər üzrə tərəfdaşlığın bundan sonra da dərinləşdiriləcəyini ifadə ediblər.