İstanbulda müəmmalı ölüm: Azərbaycanlı iş adamının faciəvi taleyi və tanınmış tiktokerlə əlaqəsi ortaya çıxdı

Türkiyədə meyiti aşkarlanan azərbaycanlı iş adamı ilə bağlı yeni detallar ortaya çıxıb. Rövşən Zeynalovun cəsədi ailəsinə təhvil verilib və bu gün Azərbaycana gətiriləcək.

Minval.info xəbər verir ki, Qubadlı rayonundan olan Rövşən Zeynalov Türkiyədə ayaqqabı biznesi ilə məşğul idi. Ən diqqətçəkən məqam isə onun “Bəniz” ləqəbli tiktoker Aybəniz Xəlilovanın keçmiş həyat yoldaşı olmasıdır. Onların bu evlilikdən Mətin adlı bir övladı var.

Xatırladaq ki, Aybəniz Xəlilova hazırda həbsdədir və ona 10 il 3 ay həbs cəzası verilib. Avqustun 11-də İstanbulun Qaziosmanpaşa rayonunda Rövşən Zeynalovun meyiti tapılıb. Mənzildən gələn pis qoxu səbəbindən qonşular polisə məlumat veriblər. Polis mənzilə daxil olduqda, Rövşən Zeynalovun cəsədini və psixoloji problemləri olduğu iddia edilən bacısı Mətanət Zeynalovu aşkar ediblər. Bacısının, qardaşının meyiti ilə bir həftə eyni evdə yaşadığı müəyyən edilib. Mənzildə qan izləri də tapılıb və ölümün səbəbi araşdırılır.