Hüseyn həsənovun dörd illik hökmü: Apellyasiya şikayəti nələri dəyişəcək?

Rusiyalı tanınmış bloqer Hüseyn Həsənovun dörd illik həbs cəzası ilə bağlı yeni məlumatlar ortaya çıxıb. Onun vəkili Mixail Yusupov, Moskvanın Presnensk rayon məhkəməsinin qiyabi hökmünə qarşı apellyasiya şikayəti verəcəyini bildirib.

Minval.info xəbər verir ki, Yusupov, məhkəmənin qərarından narazı olduqlarını və fərqli bir nəticə gözlədiklərini ifadə edib. Müdafiə tərəfi, məhkəmədən ya bəraət hökmü, ya da cinayət işinin prokurora qaytarılmasını tələb etmişdi. Lakin məhkəmə bu tələbləri qəbul etməyib.

Hüseyn Həsənovun məhkəmə qərarından xəbərdar olduğu bildirilir. Lakin vəkil, bloqerlə gələcək hüquqi addımların detallarını hələ müzakirə etmədiyini qeyd edib. Yusupov, qiyabi hökmün Həsənovun xaricdə qalmasına ciddi təsir etməyəcəyini düşünür. Onun sözlərinə görə, hökm qanuni qüvvəyə minənədək icra olunmayacaq və bu müddət ərzində cəzanın icrasından yayınmaq ehtimalı mövcuddur.