Çimərliyə gedənlərin nəzərinə: FHN-dən həyati vacib XƏBƏRDARLIQ!

Milli Hidrometeorologiya Xidmətinin rəsmi proqnozlarına əsasən, iyulun 27-si və 28-də ölkə ərazisində hava şəraitinin kəskin dəyişəcəyi, güclü küləyin əsəcəyi gözlənilir.

Yaranan bu təhlükəli vəziyyətlə əlaqədar olaraq Fövqəladə Hallar Nazirliyi (FHN) təcili şəkildə əhaliyə müraciət ünvanlayıb və müvafiq təhlükəsizlik qaydalarını vətəndaşlara bir daha xatırladıb.

Minval.info xəbər verir ki, nazirliyin yaydığı xəbərdarlıqda xüsusilə yay mövsümündə dəniz kənarına axın edən istirahətçilərə ciddi xəbərdarlıq yer alıb. Qurum bəyan edib ki, küləkli və dalğalı hava şəraitində dənizə girmək insan həyatı üçün son dərəcə təhlükəlidir. Eyni zamanda, kiçikhəcmli gəmi istifadəçilərinin də belə hava şəraitində açıq dənizə çıxmasının tamamilə qadağan olduğu diqqətə çatdırılıb.

FHN həmçinin xatırladır ki, güclü külək isti və quru yay günlərində qəfil baş verən yanğınların söndürülməsini kəskin şəkildə çətinləşdirir. Bu səbəbdən də vətəndaşlardan yanğın təhlükəsizliyi qaydalarına maksimum dərəcədə ciddi riayət etmələri tələb olunur.

Nazirlik küçədə olan vətəndaşlara da çağırış edərək bunları tövsiyə edib:

“Güclü külək zamanı yüngül konstruksiyalı və müvəqqəti tikililərdən, hündür bina və reklam lövhələrindən mütləq uzaq durun. Həmçinin, elektrik dirəyi, gərginlik naqilləri və hündür ağacların altında dayanmaq, avtomobilləri buralarda saxlamaq həyatınız üçün risklidir”.