Avropada yeniyetmələrə sosial şəbəkə məhdudiyyəti!

Avropa Komissiyası, 13 yaşına çatmamış uşaqların sosial şəbəkələrdən istifadəsini qadağan edən və 13-15 yaşlı yeniyetmələrin girişini məhdudlaşdıran yeni “Uşaqlar haqqında qanun”u təklif edib. Bu qanun layihəsi, Avropa Komissiyasının rəhbəri Ursula fon der Lyayen tərəfindən təqdim olunub.

Minval.info xəbər verir ki, bu qanun çərçivəsində hər yaş qrupuna uyğun fərdi müdafiə səviyyələri müəyyən ediləcək. 13 yaşdan kiçik uşaqlar üçün sosial şəbəkələrə tam qadağa tətbiq olunacaq, 13-15 yaş arası yeniyetmələr isə yalnız valideynlər və ya qəyyumlar tərəfindən idarə olunan, məhdud funksiyalara malik mini-hesablardan istifadə edə biləcəklər. Bu hesablar gündə maksimum bir saat istifadə edilə biləcək. 15-18 yaş arası yeniyetmələr üçün isə platformaların təhlükəsiz dizaynı məcburi olacaq.

Fon der Lyayen, həmçinin 18 yaşdan kiçik uşaqlara xidmət göstərən onlayn oyunlar, video xidmətlər, süni intellekt çat-botları və sosial platformalar üçün bir sıra öhdəliklərin tətbiq olunmasını təklif edib. Bu tədbirlər “Facebook”, “Instagram” və “YouTube” kimi platformalara da şamil ediləcək.