“Ailənin tək oğlan övladı ön cəbhədə xidmət keçməməlidir” — deputatdan TƏKLİF

“Düşünürəm ki, bu gün Azərbaycan müharibə vəziyyətində olsa da, ancaq geniş hərbi əməliyyatlar getmir. Doğrudur, cəbhədə hər gün atəşkəs pozulur. Ancaq Azərbaycan Ordusunun igid oğulları düşmənin cavabını layiqincə verir. Hesab edirəm ki, belə bir vəziyyətdə ailələrin tək oğlan övladları arxa cəbhələrdə xidmət etsələr, bu İslam əxlaqına da tam uyğun olar. Çünki bu gün Azərbaycanda elə ailələr var ki, orada 5 qızı olsa da, oğul övladı olmayana sonsuz kimi baxırlar. Bu əxlaq müstəvisində və bu cür düşüncə ilə yanaşsaq, o zaman ailələrin tək oğlan övladlarının ön cəbhədə deyil, arxa cəbhədə xidmət keçməsi məqbul sayılır. Ancaq əgər müharibə başlayarsa, o zaman mən də əli silah tutan hər bir şəxsin cəbhəyə yollanmasına tərəfdaram”.