Yava dənizində 243 nəfərlik gəmi faciəsi

İndoneziyada Yava dənizində hərəkətdə olan və göyərtəsində 243 nəfərin olduğu “Virgo Transport 8” adlı gəmi ilə əlaqə kəsilib. Hadisə fırtına zamanı baş verib və gəminin ekipajı ilə əlaqə yerli vaxtla saat 02:00 radələrində hava şəraitinin kəskin pisləşməsindən sonra itib.

Minval.info xəbər verir ki, gəminin sonuncu dəfə Banjarmasində yerləşən “SAR Basirih” körpüsündən təxminən 80 dəniz mili məsafədə olduğu müəyyən edilib. Hazırda gəminin tapılması və göyərtəsindəki insanların xilas edilməsi üçün genişmiqyaslı axtarış əməliyyatı aparılır. İşlərə dəniz qüvvələri, su polisi, liman və naviqasiya xidmətlərinin əməkdaşları cəlb olunub.

İndoneziya Milli Axtarış və Xilasetmə Agentliyinin məlumatına görə, 102 nəfər xilas edilib, 1 nəfər isə həyatını itirib. Gəmi Surabayadan Banjarmasihə doğru hərəkət edərkən hava şəraitinin pisləşməsi nəticəsində qəzaya uğrayıb. Axtarış-xilasetmə əməliyyatları davam edir.