“Yardım məsələsində məcburiyyət yolverilməzdir”

“Qardaş ölkədə zəlzələdən zərər çəkən insanlara yardım etmək könül işidir. İnsanlar bunu könüllü şəkildə etməlidir. Bu gün çoxları imkan daxilində Türkiyəyə yardım göstərməyə çalışır. Ancaq imkanı çatmayan insanların buna məcbur edilməsi yolverilməzdir. Əgər belə hallar varsa, bu, araşdırılmalı və müvafiq qurum ortaya konkret münasibət qoyumalıdır”.

Bu fikirləri Bakupost.az -a açıqlamasında millət vəkili Fazil Mustafa deyib.

O qeyd edib ki, kimin imkanı çatırsa yardım edə bilər, amma heç bir halda insanları buna məcbur etmək olmaz:

“Azərbaycanın əhalisinin böyük əksəriyyəti canla-başla, imkanı çatdığı qədər Türkiyəyə dəstək verdi və verir də. İnsanlar bu gün də yardımlar edir. Əlbəttə ki, hamı qardaş Türkiyəyə yardım etməyə hazırdır. Amma bu cür məcburetmələr olmamalıdır”.